8 août 2020

Izem, yemma-s d tasedda

Lwennas, 20 n yiseggasen-aya

Nekk i iḥemmlen taqvaylit-iw, am Netta; nekk i ittasmen fell-as, am Netta;
irza-d ɣur-i wanza-s, anza n Lwennas N At Lewnis; urgaɣ-t, leɛca-a.
D yir targit.
Di tnafa, xuyleɣ-d udem-is, iḍsa-yi-d mi iyi-d-iẓra, iger-iyi-d s yiɣallen, yenna-d ‘’A tarwa’’. Setḥaɣ ad s-erreɣ taḍsa; azmumeg-iw yeqqur. Setḥaɣ ad refdeɣ udem-iw ɣur-s, ad t-waliɣ allen deg wallen. Huvaɣ ad d-adreɣ ula d isem-is. Yečča-yi-d wul-iw ad d-neṭṭqeɣ maca ɛeṛqqen-iyi lehḍur, awal ur d-yuli; ṛɣiɣ ad nemger s yiɣalen maca ɛekfeɣ si leḥya; ẓemḍeɣ din. Tfuk targit.

Di targit-iw-nni tarẓagant -lemmer meqqar ttruɣ d isaffen-, riɣ ad as-iniɣ:

Wissen, a Lwennas gma, ahat tethennaḍ.
Tethennaḍ ur teẓriḍ i iḍeṛṛun ass-a di tmazɣiwin meṛṛa; di tinna-nneɣ, tamurt n yiqavayliyen. I yellan deg-s yesugad, yuɣal yesmexlil; dayen qerriḥen ugar n tmettant: d aɣuṛṛu, yugar win iɣef tecniḍ.
Tethennaḍ ur teẓriḍ tamurt n zzit n uzemmur tettazal deg uɣelluy deg yirebbi n tnezremt. Mazal irgazen, a Lwennas gma, d tidet, mazal lxalat, mazal iseɣ, maca tamurt tetteɣlay trennu.

Wissen ahat tethennaḍ.
Tethennaḍ ur teẓriḍ icumar n tzikert uɣen adeg n cclaɣem n tirugza; ijufaṛ n yijilvaven n teɛṛavt ṭṭfen adeg n ṛṛuba n ccac n teqvaylit, aveṛnus iǧǧa avrid i uqenddur.
Leǧwameɛ ttnernin; di yal taddart yerna-d wis sin, di kra n tuddar ugar.
Iqvayliyen i ikecmen ɛemṛayen, acḥal n leqrun-aya, ugin ad d-effeɣen seg-s.

Lemer ad teẓreḍ.
Tal tiɣremt tuɣal d tasga uɣilif; Seg wass ar wass, ixxamen ttaɣallen d leǧwameɛ rennun. Leǧwameɛ ttaččarren rennun. Zik, akken teẓriḍ, ḥala kra n yimɣaren i ten-ikeččmen; tura ttemsazzalen ɣur-sen yilmeẓẓyen. Di kra n tuddar, teddunt-d ula d lxalat akked tullas; a ttẓallant deffir n yirgazen, imergazen. Ugaden tamettant, nutni yemmuten.

Lemer ad teẓreḍ.
Deg timqevrin, wa ittẓala, wa iqqar taẓallit d lvidɛa. Taqvaylit-nni n zik tewḥel gar-asen, a Lwennas gma. Imɣaren di tuddar iɛreɣ-asen cced i uyeddid; sussmen; arrac fkan-asen aẓuɣer.

Lemer ad teẓreḍ.
Ɣezzifit yicumar, lexxaxit yiqundyaṛ, qeḥḍen wulawen, sevken wallaɣen, vrant wallen, kkawen yifadden. Zzukren yilsawen; deg yimawen, yuget ḥala lḥamdu; kra nniḍen ggugmen.

Lemmer ad teẓreḍ.
Izad i izaden; nger di ddel, ur neẓri amek. Tarwa teksa am wuli; imawlan vran i ṭṭvel deg waman; afrux isselqaḍ vava-s, yir aselqeḍ. Aqvayli iẓad deg-s yiles, ičča-t usuṛdi, issazzal-it uɛebbuḍ-is, “ittsewwiq deg wayen ur nemɛin’’, ih, “deg uɣilif iṛǧa liser’’. I d-ǧǧan imezwura, sexlewḍen-t ineggura. Wiyi n tura, aveḥri i d-iṣuḍen ad ten-yawi.
Annaɣ teẓriḍ, a Lwennas gma, ḥala ɣef uqeṛṛuy n uqvayli i tettezzi; izga iḥettev-itent, izga itettuy-itent. Ur yeẓri anda i ṭṭerḍiqent.

Lemmer ad teẓreḍ, a Lwennas gma.
Aqvayli mazal ikkat di gma-s. Ugar, irna kra, irna aṭas; izad-as lehlak.
Mazal-aɣ mi d-yekker yiwen seg-nneɣ ad aɣ-isved iseɣ, ad aɣ-d-yerr isem d tjaddit, ad as-d-mmɣen watmaten-is d ahdum n tiɣyulit akken ad sfeṛḥen iɛdawen.

Lemmer ad teẓreḍ.
Win iwumi d-temɣi tcelɣumt ad k-yini “Nekk mgal-nwen meṛṛa, iman-iw’’; mazal-aɣ tikta mgaradent almi d ulamek, almi d acerreg.

Annaɣ, a gma !
Aqvayli ḥersen fell-as, teḥres fell-as ddunit, iḥres ɣef lǧiv-is; ur d-ittak duṛu i teqvaylit-is.

A wi i k-iḥkan, a gma !
Inaẓuṛen simmal ttinigen, simmal ttnejlan. Wiyaḍ iwumi ur d-tṣaḥ, ad ten-tafeḍ d iceṭṭaḥen, am zik, maci d amaynut; maca ugten, ugten nniǧ n tezmert.

Aaah, a Lwennas gma !
Ula d JSK-nni, tin iɣef nvedd, tin i ivedden yis-nneɣ; tin iɣef d-nettawi deg annaren “maɛlic ma nemmut argaz tameṭṭut”, ula d tin tettmettat; tuɣal d menwala; ur d-tettawi, ur d-tettarra; nekkni deg-s ur d-nenḥerwa. Ur neẓri ma ad d-tegri azekka.

Lemmer ad tezṛeḍ, a Lwennas gma.
Tiẓegwa akked yidurar-nneɣ rnan deg urɣu, seg useggas ar wayeḍ; ddant tudrin, ddant tzemrin, yedda ula d lmal.

Annaɣ, a gma.
Mazal vennun-aɣ leḥvus, saččaren-ten s tarwa-nneɣ; mazal settruyen-ten tyemmatin. Ur d iɣervazen, ur d isviṭaren; yemmet uqvayli !
Mazal tamaziɣt-nni iɣef-tent-neṛwa tettuɣal ar deffir; ur tekcim tussna, neɣ tujjya, neɣ tatiknulujit deg uɣervaz.

Lemmer ad tezṛeḍ, a gma.
Tamaziɣt ran ad tt-arun s tzikert, seg yeffus ar zelmeḍ.

A Lwennas gma; kečč i yemmuten s ukalacnikuf gar yifassen-ik, di tmurt-ik; kečč i smenyifen ad teɣliḍ tettwaɣeḍleḍ s ṛṛsas ɣef tektiwin-ik, ɣef tmaziɣt-ik taqvaylit, wala ad temteḍ s tewser neɣ lehlak deg usu-k; tiyi akk nessusem-asent.
Maca, a Lwennas gma, ass-a kkren-d yilmeẓẓyen d telmeẓẓyin, reffden annay, ttawin-d aseɣret, ttqavalen uzzal d teṛsasin; ttqavalen isaltiyen d iǧadaṛmiyen.
Maca, a Lwennas gma, tikti tella, iseɣ yella, ad yili.

Tariq Atinuc

NB:
Ce texte est une traduction / adaptation d’une idée originale (hommage dans un rêve à Matoub) et d’un résumé de texte en français de Byba Akardjoudj.